Nga sot reduktohet me 40 për qind transporti publik në të gjithë Shqipërinë
Reduktimi i flotës prek Tiranën dhe rrethet, pas mungesës së masave mbështetëse për karburantin.
Duke nisur nga data 15 prill, transporti publik në të gjithë vendin do të reduktohet me 40%, si një masë emergjente e ndërmarrë nga operatorët për të përballuar rritjen e kostove, kryesisht të lidhura me çmimin e karburantit.
Vendimi është bërë publik nga Shoqata Kombëtare e Transportit Qytetas dhe Shoqata e Transportit Urban dhe Interurban, të cilat theksojnë se nuk kanë marrë asnjë mbështetje konkrete nga institucionet, pavarësisht kërkesave të përsëritura për subvencionim.
Mungesa e reagimit institucional
Sipas shoqatave, edhe pas takimit të zhvilluar më 1 prill 2026 me institucionet përgjegjëse, nuk është miratuar asnjë skemë kompensimi për rritjen e çmimit të karburantit dhe nuk ka një plan veprimi për lehtësimin e barrës financiare të sektorit.
Operatorët nënvizojnë se nuk është dhënë asnjë afat konkret për ndërhyrje, ndërsa mungon edhe nisja e rishikimit të elementeve fiskale që ndikojnë drejtpërdrejt në kostot operative, si akciza, TVSH-ja dhe taksa e qarkullimit.
Reduktim i menjëhershëm i shërbimit
Si pasojë e kësaj situate, operatorët janë detyruar të ulin me 40% numrin e mjeteve në qarkullim, duke prekur autobusët në Tiranë dhe flotën në qytetet e tjera, përfshirë edhe furgonat ndërqytetas.
Sipas tyre, kjo është një masë e detyruar për të përballuar situatën financiare, e cila është përkeqësuar ndjeshëm nga rritja e kostove dhe mungesa e mbështetjes.
Thirrje për mirëkuptim dhe ndërhyrje urgjente
Shoqatat u bëjnë thirrje qytetarëve për mirëkuptim dhe planifikim të udhëtimeve, duke theksuar se reduktimi i shërbimit nuk është rezultat i vullnetit të operatorëve, por pasojë direkte e mungesës së ndërhyrjes institucionale.
Ato shprehen të hapura për dialog, por kërkojnë ndërhyrje të menjëhershme dhe efektive për të shmangur përkeqësimin e mëtejshëm të situatës dhe për të garantuar vijimësinë e transportit publik në vend.
k.jpg)